Greek Reader — The Homeric Iliad (9.1

9.1 ὣς οἱ μὲν Τρῶες φυλακὰς ἔχον · αὐτὰρ Ἀχαιοὺς

9.2 θεσπεσίη ἔχε φύζα φόβου κρυόεντος ἑταίρη ,

9.3 πένθεϊ δ’ ἀτλήτῳ βεβολήατο πάντες ἄριστοι .

9.4 ὡς δ’ ἄνεμοι δύο πόντον ὀρίνετον ἰχθυόεντα

9.5 Βορέης καὶ Ζέφυρος , τώ τε Θρῄκηθεν ἄητον

9.6 ἐλθόντ’ ἐξαπίνης · ἄμυδις δέ τε κῦμα κελαινὸν

9.7 κορθύεται , πολλὸν δὲ παρὲξ ἅλα φῦκος ἔχευεν ·

9.8 ὣς ἐδαΐζετο θυμὸς ἐνὶ στήθεσσιν Ἀχαιῶν .

9.9 Ἀτρεΐδης δ’ ἄχεϊ μεγάλῳ βεβολημένος ἦτορ

9.10 φοίτα κηρύκεσσι λιγυφθόγγοισι κελεύων

9.11 κλήδην εἰς ἀγορὴν κικλήσκειν ἄνδρα ἕκαστον ,

9.12 μὴ δὲ βοᾶν · αὐτὸς δὲ μετὰ πρώτοισι πονεῖτο .

9.13 ἷζον δ’ εἰν ἀγορῇ τετιηότες · ἂν δ’ Ἀγαμέμνων

9.14 ἵστατο δάκρυ χέων ὥς τε κρήνη μελάνυδρος

9.15 ἥ τε κατ’ αἰγίλιπος πέτρης δνοφερὸν χέει ὕδωρ ·

9.16 ὣς ὃ βαρὺ στενάχων ἔπε’ Ἀργείοισι μετηύδα ·

9.17 ὦ φίλοι Ἀργείων ἡγήτορες ἠδὲ μέδοντες

9.18 Ζεύς με μέγα Κρονίδης ἄτῃ ἐνέδησε βαρείῃ

9.19 σχέτλιος , ὃς τότε μέν μοι ὑπέσχετο καὶ κατένευσεν

9.20 Ἴλιον ἐκπέρσαντ’ εὐτείχεον ἀπονέεσθαι ,

9.21 νῦν δὲ κακὴν ἀπάτην βουλεύσατο , καί με κελεύει

9.22 δυσκλέα Ἄργος ἱκέσθαι , ἐπεὶ πολὺν ὤλεσα λαόν .

9.23 οὕτω που Διὶ μέλλει ὑπερμενέϊ φίλον εἶναι ,

9.24 ὃς δὴ πολλάων πολίων κατέλυσε κάρηνα

9.25 ἠδ’ ἔτι καὶ λύσει · τοῦ γὰρ κράτος ἐστὶ μέγιστον .

9.26 ἀλλ’ ἄγεθ’ ὡς ἂν ἐγὼ εἴπω πειθώμεθα πάντες ·

9.27 φεύγωμεν σὺν νηυσὶ φίλην ἐς πατρίδα γαῖαν ·

9.28 οὐ γὰρ ἔτι Τροίην αἱρήσομεν εὐρυάγυιαν .

9.29 ὣς ἔφαθ’ , οἳ δ’ ἄρα πάντες ἀκὴν ἐγένοντο σιωπῇ .

9.30 δὴν δ’ ἄνεῳ ἦσαν τετιηότες υἷες Ἀχαιῶν ·

9.31 ὀψὲ δὲ δὴ μετέειπε βοὴν ἀγαθὸς Διομήδης ·

9.32 Ἀτρεΐδη σοὶ πρῶτα μαχήσομαι ἀφραδέοντι ,