Greek Reader — The Homeric Iliad (7.247

7.247 ἓξ δὲ διὰ πτύχας ἦλθε δαΐζων χαλκὸς ἀτειρής ,

7.248 ἐν τῇ δ’ ἑβδομάτῃ ῥινῷ σχέτο · δεύτερος αὖτε

7.249 Αἴας διογενὴς προΐει δολιχόσκιον ἔγχος ,

7.250 καὶ βάλε Πριαμίδαο κατ’ ἀσπίδα πάντοσ’ ἐΐσην .

7.251 διὰ μὲν ἀσπίδος ἦλθε φαεινῆς ὄβριμον ἔγχος ,

7.252 καὶ διὰ θώρηκος πολυδαιδάλου ἠρήρειστο ·

7.253 ἀντικρὺ δὲ παραὶ λαπάρην διάμησε χιτῶνα

7.254 ἔγχος · ὃ δ’ ἐκλίνθη καὶ ἀλεύατο κῆρα μέλαιναν .

7.255 τὼ δ’ ἐκσπασσαμένω δολίχ’ ἔγχεα χερσὶν ἅμ’ ἄμφω

7.256 σύν ῥ’ ἔπεσον λείουσιν ἐοικότες ὠμοφάγοισιν

7.257 ἢ συσὶ κάπροισιν , τῶν τε σθένος οὐκ ἀλαπαδνόν .

7.258 Πριαμίδης μὲν ἔπειτα μέσον σάκος οὔτασε δουρί ,

7.259 οὐδ’ ἔρρηξεν χαλκός , ἀνεγνάμφθη δέ οἱ αἰχμή .

7.260 Αἴας δ’ ἀσπίδα νύξεν ἐπάλμενος · ἣ δὲ διαπρὸ

7.261 ἤλυθεν ἐγχείη , στυφέλιξε δέ μιν μεμαῶτα ,

7.262 τμήδην δ’ αὐχέν’ ἐπῆλθε , μέλαν δ’ ἀνεκήκιεν αἷμα ,

7.263 ἀλλ’ οὐδ’ ὧς ἀπέληγε μάχης κορυθαίολος Ἕκτωρ ,

7.264 ἀλλ’ ἀναχασσάμενος λίθον εἵλετο χειρὶ παχείῃ

7.265 κείμενον ἐν πεδίῳ μέλανα τρηχύν τε μέγαν τε ·

7.266 τῷ βάλεν Αἴαντος δεινὸν σάκος ἑπταβόειον

7.267 μέσσον ἐπομφάλιον · περιήχησεν δ’ ἄρα χαλκός .

7.268 δεύτερος αὖτ’ Αἴας πολὺ μείζονα λᾶαν ἀείρας

7.269 ἧκ’ ἐπιδινήσας , ἐπέρεισε δὲ ἶν’ ἀπέλεθρον ,

7.270 εἴσω δ’ ἀσπίδ’ ἔαξε βαλὼν μυλοειδέϊ πέτρῳ ,

7.271 βλάψε δέ οἱ φίλα γούναθ’ · ὃ δ’ ὕπτιος ἐξετανύσθη

7.272 ἀσπίδι ἐγχριμφθείς · τὸν δ’ αἶψ’ ὤρθωσεν Ἀπόλλων .

7.273 καί νύ κε δὴ ξιφέεσσ’ αὐτοσχεδὸν οὐτάζοντο ,

7.274 εἰ μὴ κήρυκες Διὸς ἄγγελοι ἠδὲ καὶ ἀνδρῶν

7.275 ἦλθον , ὃ μὲν Τρώων , ὃ δ’ Ἀχαιῶν χαλκοχιτώνων ,

7.276 Ταλθύβιός τε καὶ Ἰδαῖος πεπνυμένω ἄμφω ·