Greek Reader — The Homeric Iliad (4.496

4.496 στῆ δὲ μάλ’ ἐγγὺς ἰὼν καὶ ἀκόντισε δουρὶ φαεινῷ

4.497 ἀμφὶ ἓ παπτήνας · ὑπὸ δὲ Τρῶες κεκάδοντο

4.498 ἀνδρὸς ἀκοντίσσαντος · ὃ δ’ οὐχ ἅλιον βέλος ἧκεν ,

4.499 ἀλλ’ υἱὸν Πριάμοιο νόθον βάλε Δημοκόωντα

4.500 ὅς οἱ Ἀβυδόθεν ἦλθε παρ’ ἵππων ὠκειάων .

4.501 τόν ῥ’ Ὀδυσεὺς ἑτάροιο χολωσάμενος βάλε δουρὶ

4.502 κόρσην · ἣ δ’ ἑτέροιο διὰ κροτάφοιο πέρησεν

4.503 αἰχμὴ χαλκείη · τὸν δὲ σκότος ὄσσε κάλυψε ,

4.504 δούπησεν δὲ πεσών , ἀράβησε δὲ τεύχε’ ἐπ’ αὐτῷ .

4.505 χώρησαν δ’ ὑπό τε πρόμαχοι καὶ φαίδιμος Ἕκτωρ ·

4.506 Ἀργεῖοι δὲ μέγα ἴαχον , ἐρύσαντο δὲ νεκρούς ,

4.507 ἴθυσαν δὲ πολὺ προτέρω · νεμέσησε δ’ Ἀπόλλων

4.508 Περγάμου ἐκκατιδών , Τρώεσσι δὲ κέκλετ’ ἀΰσας ·

4.509 ὄρνυσθ’ ἱππόδαμοι Τρῶες μηδ’ εἴκετε χάρμης

4.510 Ἀργείοις , ἐπεὶ οὔ σφι λίθος χρὼς οὐδὲ σίδηρος

4.511 χαλκὸν ἀνασχέσθαι ταμεσίχροα βαλλομένοισιν ·

4.512 οὐ μὰν οὐδ’ Ἀχιλεὺς Θέτιδος πάϊς ἠϋκόμοιο

4.513 μάρναται , ἀλλ’ ἐπὶ νηυσὶ χόλον θυμαλγέα πέσσει .

4.514 ὣς φάτ’ ἀπὸ πτόλιος δεινὸς θεός · αὐτὰρ Ἀχαιοὺς

4.515 ὦρσε Διὸς θυγάτηρ κυδίστη Τριτογένεια

4.516 ἐρχομένη καθ’ ὅμιλον , ὅθι μεθιέντας ἴδοιτο .

4.517 ἔνθ’ Ἀμαρυγκείδην Διώρεα μοῖρα πέδησε ·

4.518 χερμαδίῳ γὰρ βλῆτο παρὰ σφυρὸν ὀκριόεντι

4.519 κνήμην δεξιτερήν · βάλε δὲ Θρῃκῶν ἀγὸς ἀνδρῶν

4.520 Πείρως Ἰμβρασίδης ὃς ἄρ’ Αἰνόθεν εἰληλούθει .

4.521 ἀμφοτέρω δὲ τένοντε καὶ ὀστέα λᾶας ἀναιδὴς

4.522 ἄχρις ἀπηλοίησεν · ὃ δ’ ὕπτιος ἐν κονίῃσι

4.523 κάππεσεν ἄμφω χεῖρε φίλοις ἑτάροισι πετάσσας

4.524 θυμὸν ἀποπνείων · ὃ δ’ ἐπέδραμεν ὅς ῥ’ ἔβαλέν περ

4.525 Πείροος , οὖτα δὲ δουρὶ παρ’ ὀμφαλόν · ἐκ δ’ ἄρα πᾶσαι

4.526 χύντο χαμαὶ χολάδες , τὸν δὲ σκότος ὄσσε κάλυψε .