Greek Reader — The Homeric Iliad (1.552

1.552 αἰνότατε Κρονίδη ποῖον τὸν μῦθον ἔειπες ;

1.553 καὶ λίην σε πάρος γ’ οὔτ’ εἴρομαι οὔτε μεταλλῶ ,

1.554 ἀλλὰ μάλ’ εὔκηλος τὰ φράζεαι ἅσσ’ ἐθέλῃσθα .

1.555 νῦν δ’ αἰνῶς δείδοικα κατὰ φρένα μή σε παρείπῃ

1.556 ἀργυρόπεζα Θέτις θυγάτηρ ἁλίοιο γέροντος ·

1.557 ἠερίη γὰρ σοί γε παρέζετο καὶ λάβε γούνων ·

1.558 τῇ σ’ ὀΐω κατανεῦσαι ἐτήτυμον ὡς Ἀχιλῆα

1.559 τιμήσῃς , ὀλέσῃς δὲ πολέας ἐπὶ νηυσὶν Ἀχαιῶν .

1.560 τὴν δ’ ἀπαμειβόμενος προσέφη νεφεληγερέτα Ζεύς ·

1.561 δαιμονίη αἰεὶ μὲν ὀΐεαι οὐδέ σε λήθω ·

1.562 πρῆξαι δ’ ἔμπης οὔ τι δυνήσεαι , ἀλλ’ ἀπὸ θυμοῦ

1.563 μᾶλλον ἐμοὶ ἔσεαι · τὸ δέ τοι καὶ ῥίγιον ἔσται .

1.564 εἰ δ’ οὕτω τοῦτ’ ἐστὶν ἐμοὶ μέλλει φίλον εἶναι ·

1.565 ἀλλ’ ἀκέουσα κάθησο , ἐμῷ δ’ ἐπιπείθεο μύθῳ ,

1.566 μή νύ τοι οὐ χραίσμωσιν ὅσοι θεοί εἰσ’ ἐν Ὀλύμπῳ

1.567 ἆσσον ἰόνθ’ , ὅτε κέν τοι ἀάπτους χεῖρας ἐφείω .

1.568 ὣς ἔφατ’ ἔδεισεν δὲ βοῶπις πότνια Ἥρη ,

1.569 καί ῥ’ ἀκέουσα καθῆστο ἐπιγνάμψασα φίλον κῆρ ·

1.570 ὄχθησαν δ’ ἀνὰ δῶμα Διὸς θεοὶ Οὐρανίωνες ·

1.571 τοῖσιν δ’ Ἥφαιστος κλυτοτέχνης ἦρχ’ ἀγορεύειν

1.572 μητρὶ φίλῃ ἐπίηρα φέρων λευκωλένῳ Ἥρῃ ·

1.573 ἦ δὴ λοίγια ἔργα τάδ’ ἔσσεται οὐδ’ ἔτ’ ἀνεκτά ,

1.574 εἰ δὴ σφὼ ἕνεκα θνητῶν ἐριδαίνετον ὧδε ,

1.575 ἐν δὲ θεοῖσι κολῳὸν ἐλαύνετον · οὐδέ τι δαιτὸς

1.576 ἐσθλῆς ἔσσεται ἦδος , ἐπεὶ τὰ χερείονα νικᾷ .

1.577 μητρὶ δ’ ἐγὼ παράφημι καὶ αὐτῇ περ νοεούσῃ

1.578 πατρὶ φίλῳ ἐπίηρα φέρειν Διί , ὄφρα μὴ αὖτε

1.579 νεικείῃσι πατήρ , σὺν δ’ ἡμῖν δαῖτα ταράξῃ .

1.580 εἴ περ γάρ κ’ ἐθέλῃσιν Ὀλύμπιος ἀστεροπητὴς