Greek Reader — The Homeric Iliad (9.680

9.680 φράζεσθαι ἐν Ἀργείοισιν ἄνωγεν

9.681 ὅππως κεν νῆάς τε σαῷς καὶ λαὸν Ἀχαιῶν ·

9.682 αὐτὸς δ’ ἠπείλησεν ἅμ’ ἠοῖ φαινομένηφι

9.683 νῆας ἐϋσσέλμους ἅλαδ’ ἑλκέμεν ἀμφιελίσσας .

9.684 καὶ δ’ ἂν τοῖς ἄλλοισιν ἔφη παραμυθήσασθαι

9.685 οἴκαδ’ ἀποπλείειν , ἐπεὶ οὐκέτι δήετε τέκμωρ

9.686 Ἰλίου αἰπεινῆς · μάλα γάρ ἑθεν εὐρύοπα Ζεὺς

9.687 χεῖρα ἑὴν ὑπερέσχε , τεθαρσήκασι δὲ λαοί .

9.688 ὣς ἔφατ’ · εἰσὶ καὶ οἵδε τάδ’ εἰπέμεν , οἵ μοι ἕποντο ,

9.689 Αἴας καὶ κήρυκε δύω πεπνυμένω ἄμφω .

9.690 Φοῖνιξ δ’ αὖθ’ ὃ γέρων κατελέξατο , ὡς γὰρ ἀνώγει ,

9.691 ὄφρά οἱ ἐν νήεσσι φίλην ἐς πατρίδ’ ἕπηται

9.692 αὔριον , ἢν ἐθέλῃσιν · ἀνάγκῃ δ’ οὔ τί μιν ἄξει .

9.693 ὣς ἔφαθ’ , οἳ δ’ ἄρα πάντες ἀκὴν ἐγένοντο σιωπῇ

9.694 μῦθον ἀγασσάμενοι · μάλα γὰρ κρατερῶς ἀγόρευσε .

9.695 δὴν δ’ ἄνεῳ ἦσαν τετιηότες υἷες Ἀχαιῶν ·

9.696 ὀψὲ δὲ δὴ μετέειπε βοὴν ἀγαθὸς Διομήδης ·

9.697 Ἀτρεΐδη κύδιστε ἄναξ ἀνδρῶν Ἀγάμεμνον

9.698 μὴ ὄφελες λίσσεσθαι ἀμύμονα Πηλεΐωνα

9.699 μυρία δῶρα διδούς · ὃ δ’ ἀγήνωρ ἐστὶ καὶ ἄλλως ·

9.700 νῦν αὖ μιν πολὺ μᾶλλον ἀγηνορίῃσιν ἐνῆκας .

9.701 ἀλλ’ ἤτοι κεῖνον μὲν ἐάσομεν ἤ κεν ἴῃσιν

9.702 ἦ κε μένῃ · τότε δ’ αὖτε μαχήσεται ὁππότε κέν μιν

9.703 θυμὸς ἐνὶ στήθεσσιν ἀνώγῃ καὶ θεὸς ὄρσῃ .

9.704 ἀλλ’ ἄγεθ’ ὡς ἂν ἐγὼ εἴπω πειθώμεθα πάντες ·

9.705 νῦν μὲν κοιμήσασθε τεταρπόμενοι φίλον ἦτορ

9.706 σίτου καὶ οἴνοιο · τὸ γὰρ μένος ἐστὶ καὶ ἀλκή ·

9.707 αὐτὰρ ἐπεί κε φανῇ καλὴ ῥοδοδάκτυλος Ἠώς ,

9.708 καρπαλίμως πρὸ νεῶν ἐχέμεν λαόν τε καὶ ἵππους

9.709 ὀτρύνων , καὶ δ’ αὐτὸς ἐνὶ πρώτοισι μάχεσθαι .

9.710 ὣς ἔφαθ’ ,