Greek Reader — The Homeric Iliad (9.617

9.617 ἀγγελέουσι , σὺ δ’ αὐτόθι λέξεο μίμνων

9.618 εὐνῇ ἔνι μαλακῇ · ἅμα δ’ ἠοῖ φαινομένηφι

9.619 φρασσόμεθ’ ἤ κε νεώμεθ’ ἐφ’ ἡμέτερ’ ἦ κε μένωμεν .

9.620 ἦ καὶ Πατρόκλῳ ὅ γ’ ἐπ’ ὀφρύσι νεῦσε σιωπῇ

9.621 Φοίνικι στορέσαι πυκινὸν λέχος , ὄφρα τάχιστα

9.622 ἐκ κλισίης νόστοιο μεδοίατο · τοῖσι δ’ ἄρ’ Αἴας

9.623 ἀντίθεος Τελαμωνιάδης μετὰ μῦθον ἔειπε ·

9.624 διογενὲς Λαερτιάδη πολυμήχαν’ Ὀδυσσεῦ

9.625 ἴομεν · οὐ γάρ μοι δοκέει μύθοιο τελευτὴ

9.626 τῇδέ γ’ ὁδῷ κρανέεσθαι · ἀπαγγεῖλαι δὲ τάχιστα

9.627 χρὴ μῦθον Δαναοῖσι καὶ οὐκ ἀγαθόν περ ἐόντα

9.628 οἵ που νῦν ἕαται ποτιδέγμενοι . αὐτάρ Ἀχιλλεὺς

9.629 ἄγριον ἐν στήθεσσι θέτο μεγαλήτορα θυμὸν

9.630 σχέτλιος , οὐδὲ μετατρέπεται φιλότητος ἑταίρων

9.631 τῆς ᾗ μιν παρὰ νηυσὶν ἐτίομεν ἔξοχον ἄλλων

9.632 νηλής · καὶ μέν τίς τε κασιγνήτοιο φονῆος

9.633 ποινὴν ἢ οὗ παιδὸς ἐδέξατο τεθνηῶτος ·

9.634 καί ῥ’ ὃ μὲν ἐν δήμῳ μένει αὐτοῦ πόλλ’ ἀποτίσας ,

9.635 τοῦ δέ τ’ ἐρητύεται κραδίη καὶ θυμὸς ἀγήνωρ

9.636 ποινὴν δεξαμένῳ · σοὶ δ’ ἄληκτόν τε κακόν τε

9.637 θυμὸν ἐνὶ στήθεσσι θεοὶ θέσαν εἵνεκα κούρης

9.638 οἴης · νῦν δέ τοι ἑπτὰ παρίσχομεν ἔξοχ’ ἀρίστας ,

9.639 ἄλλά τε πόλλ’ ἐπὶ τῇσι · σὺ δ’ ἵλαον ἔνθεο θυμόν ,

9.640 αἴδεσσαι δὲ μέλαθρον · ὑπωρόφιοι δέ τοί εἰμεν

9.641 πληθύος ἐκ Δαναῶν , μέμαμεν δέ τοι ἔξοχον ἄλλων

9.642 κήδιστοί τ’ ἔμεναι καὶ φίλτατοι ὅσσοι Ἀχαιοί .

9.643 τὸν δ’ ἀπαμειβόμενος προσέφη πόδας ὠκὺς Ἀχιλλεύς ·

9.644 Αἶαν διογενὲς Τελαμώνιε κοίρανε λαῶν

9.645 πάντά τί μοι κατὰ θυμὸν ἐείσαο μυθήσασθαι ·

9.646 ἀλλά μοι οἰδάνεται κραδίη χόλῳ ὁππότε κείνων

9.647 μνήσομαι ὥς μ’ ἀσύφηλον ἐν Ἀργείοισιν ἔρεξεν

9.648 Ἀτρεΐδης ὡς εἴ τιν’ ἀτίμητον μετανάστην