Greek Reader — The Homeric Iliad (9.308

9.308 πολυμήχαν’ Ὀδυσσεῦ

9.309 χρὴ μὲν δὴ τὸν μῦθον ἀπηλεγέως ἀποειπεῖν ,

9.310 ᾗ περ δὴ φρονέω τε καὶ ὡς τετελεσμένον ἔσται ,

9.311 ὡς μή μοι τρύζητε παρήμενοι ἄλλοθεν ἄλλος .

9.312 ἐχθρὸς γάρ μοι κεῖνος ὁμῶς Ἀΐδαο πύλῃσιν

9.313 ὅς χ’ ἕτερον μὲν κεύθῃ ἐνὶ φρεσίν , ἄλλο δὲ εἴπῃ .

9.314 αὐτὰρ ἐγὼν ἐρέω ὥς μοι δοκεῖ εἶναι ἄριστα ·

9.315 οὔτ’ ἔμεγ’ Ἀτρεΐδην Ἀγαμέμνονα πεισέμεν οἴω

9.316 οὔτ’ ἄλλους Δαναούς , ἐπεὶ οὐκ ἄρα τις χάρις ἦεν

9.317 μάρνασθαι δηΐοισιν ἐπ’ ἀνδράσι νωλεμὲς αἰεί .

9.318 ἴση μοῖρα μένοντι καὶ εἰ μάλα τις πολεμίζοι ·

9.319 ἐν δὲ ἰῇ τιμῇ ἠμὲν κακὸς ἠδὲ καὶ ἐσθλός ·

9.320 κάτθαν’ ὁμῶς ὅ τ’ ἀεργὸς ἀνὴρ ὅ τε πολλὰ ἐοργώς .

9.321 οὐδέ τί μοι περίκειται , ἐπεὶ πάθον ἄλγεα θυμῷ

9.322 αἰεὶ ἐμὴν ψυχὴν παραβαλλόμενος πολεμίζειν .

9.323 ὡς δ’ ὄρνις ἀπτῆσι νεοσσοῖσι προφέρῃσι

9.324 μάστακ’ ἐπεί κε λάβῃσι , κακῶς δ’ ἄρα οἱ πέλει αὐτῇ ,

9.325 ὣς καὶ ἐγὼ πολλὰς μὲν ἀΰπνους νύκτας ἴαυον ,

9.326 ἤματα δ’ αἱματόεντα διέπρησσον πολεμίζων

9.327 ἀνδράσι μαρνάμενος ὀάρων ἕνεκα σφετεράων .

9.328 δώδεκα δὴ σὺν νηυσὶ πόλεις ἀλάπαξ’ ἀνθρώπων ,

9.329 πεζὸς δ’ ἕνδεκά φημι κατὰ Τροίην ἐρίβωλον ·

9.330 τάων ἐκ πασέων κειμήλια πολλὰ καὶ ἐσθλὰ

9.331 ἐξελόμην , καὶ πάντα φέρων Ἀγαμέμνονι δόσκον

9.332 Ἀτρεΐδῃ · ὃ δ’ ὄπισθε μένων παρὰ νηυσὶ θοῇσι

9.333 δεξάμενος διὰ παῦρα δασάσκετο , πολλὰ δ’ ἔχεσκεν .

9.334 ἄλλα δ’ ἀριστήεσσι δίδου γέρα καὶ βασιλεῦσι ·

9.335 τοῖσι μὲν ἔμπεδα κεῖται , ἐμεῦ δ’ ἀπὸ μούνου Ἀχαιῶν

9.336 εἵλετ’ , ἔχει δ’ ἄλοχον θυμαρέα · τῇ παριαύων

9.337 τερπέσθω . τί δὲ δεῖ πολεμιζέμεναι Τρώεσσιν

9.338 Ἀργείους ; τί δὲ λαὸν ἀνήγαγεν