Greek Reader — The Homeric Iliad (5.680

5.680 ὀξὺ νόησε μέγας κορυθαίολος Ἕκτωρ ·

5.681 βῆ δὲ διὰ προμάχων κεκορυθμένος αἴθοπι χαλκῷ

5.682 δεῖμα φέρων Δαναοῖσι · χάρη δ’ ἄρα οἱ προσιόντι

5.683 Σαρπηδὼν Διὸς υἱός , ἔπος δ’ ὀλοφυδνὸν ἔειπε ·

5.684 Πριαμίδη , μὴ δή με ἕλωρ Δαναοῖσιν ἐάσῃς

5.685 κεῖσθαι , ἀλλ’ ἐπάμυνον · ἔπειτά με καὶ λίποι αἰὼν

5.686 ἐν πόλει ὑμετέρῃ , ἐπεὶ οὐκ ἄρ’ ἔμελλον ἔγωγε

5.687 νοστήσας οἶκον δὲ φίλην ἐς πατρίδα γαῖαν

5.688 εὐφρανέειν ἄλοχόν τε φίλην καὶ νήπιον υἱόν .

5.689 ὣς φάτο , τὸν δ’ οὔ τι προσέφη κορυθαίολος Ἕκτωρ ,

5.690 ἀλλὰ παρήϊξεν λελιημένος ὄφρα τάχιστα

5.691 ὤσαιτ’ Ἀργείους , πολέων δ’ ἀπὸ θυμὸν ἕλοιτο .

5.692 οἳ μὲν ἄρ’ ἀντίθεον Σαρπηδόνα δῖοι ἑταῖροι

5.693 εἷσαν ὑπ’ αἰγιόχοιο Διὸς περικαλλέϊ φηγῷ ·

5.694 ἐκ δ’ ἄρα οἱ μηροῦ δόρυ μείλινον ὦσε θύραζε

5.695 ἴφθιμος Πελάγων , ὅς οἱ φίλος ἦεν ἑταῖρος .

5.696 τὸν δ’ ἔλιπε ψυχή , κατὰ δ’ ὀφθαλμῶν κέχυτ’ ἀχλύς ·

5.697 αὖτις δ’ ἐμπνύνθη , περὶ δὲ πνοιὴ Βορέαο

5.698 ζώγρει ἐπιπνείουσα κακῶς κεκαφηότα θυμόν .

5.699 Ἀργεῖοι δ’ ὑπ’ Ἄρηϊ καὶ Ἕκτορι χαλκοκορυστῇ

5.700 οὔτε ποτὲ προτρέποντο μελαινάων ἐπὶ νηῶν

5.701 οὔτε ποτ’ ἀντεφέροντο μάχῃ , ἀλλ’ αἰὲν ὀπίσσω

5.702 χάζονθ’ , ὡς ἐπύθοντο μετὰ Τρώεσσιν Ἄρηα .

5.703 ἔνθα τίνα πρῶτον τίνα δ’ ὕστατον ἐξενάριξαν

5.704 Ἕκτωρ τε Πριάμοιο πάϊς καὶ χάλκεος Ἄρης ;

5.705 ἀντίθεον Τεύθραντ’ , ἐπὶ δὲ πλήξιππον Ὀρέστην ,

5.706 Τρῆχόν τ’ αἰχμητὴν Αἰτώλιον Οἰνόμαόν τε ,

5.707 Οἰνοπίδην θ’ Ἕλενον καὶ Ὀρέσβιον αἰολομίτρην ,

5.708 ὅς ῥ’ ἐν Ὕλῃ ναίεσκε μέγα πλούτοιο μεμηλώς ,

5.709 λίμνῃ κεκλιμένος Κηφισίδι · πὰρ δέ οἱ ἄλλοι

5.710 ναῖον Βοιωτοὶ μάλα πίονα δῆμον ἔχοντες .

5.711 τοὺς δ’ ὡς οὖν ἐνόησε