Greek Reader — The Homeric Iliad (5.649

5.649 ἀφραδίῃσιν ἀγαυοῦ Λαομέδοντος ,

5.650 ὅς ῥά μιν εὖ ἕρξαντα κακῷ ἠνίπαπε μύθῳ ,

5.651 οὐδ’ ἀπέδωχ’ ἵππους , ὧν εἵνεκα τηλόθεν ἦλθε .

5.652 σοὶ δ’ ἐγὼ ἐνθάδε φημὶ φόνον καὶ κῆρα μέλαιναν

5.653 ἐξ ἐμέθεν τεύξεσθαι , ἐμῷ δ’ ὑπὸ δουρὶ δαμέντα

5.654 εὖχος ἐμοὶ δώσειν , ψυχὴν δ’ Ἄϊδι κλυτοπώλῳ .

5.655 ὣς φάτο Σαρπηδών , ὃ δ’ ἀνέσχετο μείλινον ἔγχος

5.656 Τληπόλεμος · καὶ τῶν μὲν ἁμαρτῇ δούρατα μακρὰ

5.657 ἐκ χειρῶν ἤϊξαν · ὃ μὲν βάλεν αὐχένα μέσσον

5.658 Σαρπηδών , αἰχμὴ δὲ διαμπερὲς ἦλθ’ ἀλεγεινή ·

5.659 τὸν δὲ κατ’ ὀφθαλμῶν ἐρεβεννὴ νὺξ ἐκάλυψε .

5.660 Τληπόλεμος δ’ ἄρα μηρὸν ἀριστερὸν ἔγχεϊ μακρῷ

5.661 βεβλήκειν , αἰχμὴ δὲ διέσσυτο μαιμώωσα

5.662 ὀστέω ἐγχριμφθεῖσα , πατὴρ δ’ ἔτι λοιγὸν ἄμυνεν .

5.663 οἳ μὲν ἄρ’ ἀντίθεον Σαρπηδόνα δῖοι ἑταῖροι

5.664 ἐξέφερον πολέμοιο · βάρυνε δέ μιν δόρυ μακρὸν

5.665 ἑλκόμενον · τὸ μὲν οὔ τις ἐπεφράσατ’ οὐδὲ νόησε

5.666 μηροῦ ἐξερύσαι δόρυ μείλινον ὄφρ’ ἐπιβαίη

5.667 σπευδόντων · τοῖον γὰρ ἔχον πόνον ἀμφιέποντες .

5.668 Τληπόλεμον δ’ ἑτέρωθεν ἐϋκνήμιδες Ἀχαιοὶ

5.669 ἐξέφερον πολέμοιο · νόησε δὲ δῖος Ὀδυσσεὺς

5.670 τλήμονα θυμὸν ἔχων , μαίμησε δέ οἱ φίλον ἦτορ ·

5.671 μερμήριξε δ’ ἔπειτα κατὰ φρένα καὶ κατὰ θυμὸν

5.672 ἢ προτέρω Διὸς υἱὸν ἐριγδούποιο διώκοι ,

5.673 ἦ ὅ γε τῶν πλεόνων Λυκίων ἀπὸ θυμὸν ἕλοιτο .

5.674 οὐδ’ ἄρ’ Ὀδυσσῆϊ μεγαλήτορι μόρσιμον ἦεν

5.675 ἴφθιμον Διὸς υἱὸν ἀποκτάμεν ὀξέϊ χαλκῷ ·

5.676 τώ ῥα κατὰ πληθὺν Λυκίων τράπε θυμὸν Ἀθήνη .

5.677 ἔνθ’ ὅ γε Κοίρανον εἷλεν Ἀλάστορά τε Χρομίον τε

5.678 Ἄλκανδρόν θ’ Ἅλιόν τε Νοήμονά τε Πρύτανίν τε .

5.679 καί νύ κ’ ἔτι πλέονας Λυκίων κτάνε δῖος Ὀδυσσεὺς

5.680 εἰ μὴ ἄρ’