Μνησίλοχος
846 ἰλλὸς γεγένημαι προσδοκῶν · ὁ δ’ οὐδέπω .
847 τί δῆτ’ ἂν εἴη τοὐμποδών ; οὐκ ἔσθ’ ὅπως
848 οὐ τὸν Παλαμήδην ψυχρὸν ὄντ’ αἰσχύνεται .
849 τῷ δῆτ’ ἂν αὐτὸν προσαγαγοίμην δράματι ;
850 ἐγᾦδα · τὴν καινὴν Ἑλένην μιμήσομαι .
851 πάντως ὑπάρχει μοι γυναικεία στολή .
Γυνὴ
852 τί αὖ σὺ κυρκανᾷς ; τί κοικύλλεις ἔχων ;
853 πικρὰν Ἑλένην ὄψει τάχ’ , εἰ μὴ κοσμίως
854 ἕξεις , ἕως ἂν τῶν πρυτάνεών τις φανῇ .
Μνησίλοχος
855 Νείλου μὲν αἵδε καλλιπάρθενοι ῥοαί ,
856 ὃς ἀντὶ δίας ψακάδος Αἰγύπτου πέδον
857 λευκῆς νοτίζει μελανοσυρμαῖον λεών .
Γυνὴ
858 πανοῦργος εἶ νὴ τὴν Ἑκάτην τὴν φωσφόρον .
Μνησίλοχος
859 ἐμοὶ δὲ γῆ μὲν πατρὶς οὐκ ἀνώνυμος
860 Σπάρτη , πατὴρ δὲ Τυνδάρεως .
Γυνὴ
σοί γ’ ὦλεθρε
861 πατὴρ ἐκεῖνός ἐστι ; Φρυνώνδας μὲν οὖν .
Μνησίλοχος
862 Ἑλένη δ’ ἐκλήθην .
Γυνὴ
αὖθις αὖ γίγνει γυνή ,
863 πρὶν τῆς ἑτέρας δοῦναι γυναικίσεως δίκην ;
Μνησίλοχος
864 ψυχαὶ δὲ πολλαὶ δι’ ἔμ’ ἐπὶ Σκαμανδρίαις
865 ῥοαῖσιν ἔθανον .
Γυνὴ
ὤφελες δὲ καὶ σύ γε .
Μνησίλοχος
866 κἀγὼ μὲν ἐνθάδ’ εἴμ’ · ὁ δ’ ἄθλιος πόσις
867 οὑμὸς Μενέλαος οὐδέπω προσέρχεται .