Greek Reader — Aristophanes Clouds (335

Στρεψιάδης

335 ταῦτ’ ἄρ’ ἐποίουν ὑγρᾶν Νεφελᾶν στρεπταιγλᾶν δάιον ὁρμάν ,

336 πλοκάμους θ’ ἑκατογκεφάλα Τυφῶ πρημαινούσας τε θυέλλας ,

337 εἶτ’ ἀερίας διεράς , γαμψοὺς οἰωνοὺς ἀερονηχεῖς ,

338 ὄμβρους θ’ ὑδάτων δροσερᾶν Νεφελᾶν · εἶτ’ ἀντ’ αὐτῶν κατέπινον

339 κεστρᾶν τεμάχη μεγαλᾶν ἀγαθᾶν κρέα τ’ ὀρνίθεια κιχηλᾶν .

Σωκράτης

340 διὰ μέντοι τάσδ’ οὐχὶ δικαίως ;

Στρεψιάδης

λέξον δή μοι , τί παθοῦσαι ,

341 εἴπερ νεφέλαι γ’ εἰσὶν ἀληθῶς , θνηταῖς εἴξασι γυναιξίν ;

342 οὐ γὰρ ἐκεῖναί γ’ εἰσὶ τοιαῦται .

Σωκράτης

φέρε ποῖαι γάρ τινές εἰσιν ;

Στρεψιάδης

343 οὐκ οἶδα σαφῶς · εἴξασιν γοῦν ἐρίοισιν πεπταμένοισιν ,

344 κοὐχὶ γυναιξὶν μὰ Δί’ οὐδ’ ὁτιοῦν · αὗται δὲ ῥῖνας ἔχουσιν .

Σωκράτης

345 ἀπόκριναί νυν ἅττ’ ἂν ἔρωμαι .

Στρεψιάδης

λέγε νυν ταχέως ὅ τι βούλει .

Σωκράτης

346 ἤδη ποτ’ ἀναβλέψας εἶδες νεφέλην κενταύρῳ ὁμοίαν ,

347 ἢ παρδάλει ἢ λύκῳ ἢ ταύρῳ ;

Στρεψιάδης

νὴ Δί’ ἔγωγ’ . εἶτα τί τοῦτο ;

Σωκράτης

348 γίγνονται πάνθ’ ὅ τι βούλονται · κᾆτ’ ἢν μὲν ἴδωσι κομήτην

349 ἄγριόν τινα τῶν λασίων τούτων , οἷόνπερ τὸν Ξενοφάντου ,

350 σκώπτουσαι τὴν μανίαν αὐτοῦ κενταύροις ᾔκασαν αὑτάς .

Στρεψιάδης

351 τί γὰρ ἢν ἅρπαγα τῶν δημοσίων κατίδωσι Σίμωνα , τί δρῶσιν ;