Greek Reader — Sophocles Trachiniae (248–290)

Sophocles Trachiniae 248–290

Λίχας

248 οὔκ , ἀλλὰ τὸν μὲν πλεῖστον ἐν Λυδοῖς χρόνον

249 κατείχεθ’ , ὥς φησ’ αὐτός , οὐκ ἐλεύθερος ,

250 ἀλλ’ ἐμποληθείς · τοῦ λόγου δ’ οὐ χρὴ φθόνον ,

251 γύναι , προσεῖναι , Ζεὺς ὅτου πράκτωρ φανῇ .

252 κεῖνος δὲ πραθεὶς Ὀμφάλῃ τῇ βαρβάρῳ

253 ἐνιαυτὸν ἐξέπλησεν , ὡς αὐτὸς λέγει .

254 χοὔτως ἐδήχθη τοῦτο τοὔνειδος λαβὼν

255 ὥσθ’ ὅρκον αὑτῷ προσβαλὼν διώμοσεν ,

256 ἦ μὴν τὸν ἀγχιστῆρα τοῦδε τοῦ πάθους

257 ξὺν παιδὶ καὶ γυναικὶ δουλώσειν ἔτι .

258 κοὐχ ἡλίωσε τοὔπος , ἀλλ’ ὅθ’ ἁγνὸς ἦν ,

259 στρατὸν λαβὼν ἐπακτὸν ἔρχεται πόλιν

260 τὴν Εὐρυτείαν . τόνδε γὰρ μεταίτιον

261 μόνον βροτῶν ἔφασκε τοῦδ’ εἶναι πάθους ·

262 ὃς αὐτὸν ἐλθόντ’ ἐς δόμους ἐφέστιον ,

263 ξένον παλαιὸν ὄντα , πολλὰ μὲν λόγοις

264 ἐπερρόθησε , πολλὰ δ’ ἀτηρᾷ φρενί ,

265 λέγων χεροῖν μὲν ὡς ἄφυκτ’ ἔχων βέλη

266 τῶν ὧν τέκνων λείποιτο πρὸς τόξου κρίσιν ,

267 φωνεῖ δὲ δοῦλος ἀνδρὸς ὡς ἐλευθέρου

268 ῥαίοιτο · δείπνοις δ’ ἡνίκ’ ἦν ᾠνωμένος ,

269 ἔρριψεν ἐκτὸς αὐτόν . ὧν ἔχων χόλον ,

270 ὡς ἵκετ’ αὖθις Ἴφιτος Τιρυνθίαν

271 πρὸς κλιτύν , ἵππους νομάδας ἐξιχνοσκοπῶν ,

272 τότ’ ἄλλοσ’ αὐτὸν ὄμμα , θατέρᾳ δὲ νοῦν

273 ἔχοντ’ , ἀπ’ ἄκρας ἧκε πυργώδους πλακός .

274 ἔργου δ’ ἕκατι τοῦδε μηνίσας ἄναξ

275 ὁ τῶν ἁπάντων Ζεὺς πατὴρ Ὀλύμπιος

276 πρατόν νιν ἐξέπεμψεν οὐδ’ ἠνέσχετο ,

277 ὁθούνεκ’ αὐτὸν μοῦνον ἀνθρώπων δόλῳ

278 ἔκτεινεν · εἰ γὰρ ἐμφανῶς ἠμύνατο ,

279 Ζεύς τἂν συνέγνω ξὺν δίκῃ χειρουμένῳ ·

280 ὕβριν γὰρ οὐ στέργουσιν οὐδὲ δαίμονες .

281 κεῖνοι δ’ ὑπερχλίοντες ἐκ γλώσσης κακῆς

282 αὐτοὶ μὲν Ἅιδου πάντες εἴσ’ οἰκήτορες ,

283 πόλις δὲ δούλη · τάσδε δ’ ἅσπερ εἰσορᾷς

284 ἐξ ὀλβίων ἄζηλον εὑροῦσαι βίον

285 χωροῦσι πρὸς σέ · ταῦτα γὰρ πόσις τε σὸς

286 ἐφεῖτ’ , ἐγὼ δὲ πιστὸς ὢν κείνῳ τελῶ .

287 αὐτὸν δ’ ἐκεῖνον , εὖτ’ ἂν ἁγνὰ θύματα

288 ῥέξῃ πατρῴῳ Ζηνὶ τῆς ἁλώσεως ,

289 φρόνει νιν ὡς ἥξοντα · τοῦτο γὰρ λόγου

290 πολλοῦ καλῶς λεχθέντος ἥδιστον κλύειν .