Greek Reader — Sophocles Philoctetes (1004

Φιλοκτήτης

1004 ὦ χεῖρες , οἷα πάσχετ’ ἐν χρείᾳ φίλης

1005 νευρᾶς , ὑπ’ ἀνδρὸς τοῦδε συνθηρώμεναι .

1006 ὦ μηδὲν ὑγιὲς μηδ’ ἐλεύθερον φρονῶν ,

1007 οἷ’ αὖ μ’ ὑπῆλθες , ὥς μ’ ἐθηράσω , λαβὼν

1008 πρόβλημα σαυτοῦ παῖδα τόνδ’ ἀγνῶτ’ ἐμοί ,

1009 ἀνάξιον μὲν σοῦ , κατάξιον δ’ ἐμοῦ ,

1010 ὃς οὐδὲν ᾔδει πλὴν τὸ προσταχθὲν ποεῖν ,

1011 δῆλος δὲ καὶ νῦν ἐστιν ἀλγεινῶς φέρων

1012 οἷς τ’ αὐτὸς ἐξήμαρτεν οἷς τ’ ἐγὼ ’παθον .

1013 ἀλλ’ ἡ κακὴ σὴ διὰ μυχῶν βλέπουσ’ ἀεὶ

1014 ψυχή νιν ἀφυῆ τ’ ὄντα κοὐ θέλονθ’ ὅμως

1015 εὖ προυδίδαξεν ἐν κακοῖς εἶναι σοφόν .

1016 καὶ νῦν ἔμ’ , ὦ δύστηνε , συνδήσας νοεῖς

1017 ἄγειν ἀπ’ ἀκτῆς τῆσδ’ , ἐν ᾗ με προυβάλου

1018 ἄφιλον ἔρημον ἄπολιν , ἐν ζῶσιν νεκρόν . φεῦ .

1019 ὄλοιο · καί σοι πολλάκις τόδ’ ηὐξάμην .

1020 ἀλλ’ οὐ γὰρ οὐδὲν θεοὶ νέμουσιν ἡδύ μοι ,

1021 σὺ μὲν γέγηθας ζῶν , ἐγὼ δ’ ἀλγύνομαι

1022 τοῦτ’ αὔθ’ , ὅτι ζῶ σὺν κακοῖς πολλοῖς τάλας ,

1023 γελώμενος πρὸς σοῦ τε καὶ τῶν Ἀτρέως

1024 διπλῶν στρατηγῶν , οἷς σὺ ταῦθ’ ὑπηρετεῖς .

1025 καίτοι σὺ μὲν κλοπῇ τε κἀνάγκῃ ζυγεὶς

1026 ἔπλεις ἅμ’ αὐτοῖς , ἐμὲ δὲ τὸν πανάθλιον ,

1027 ἑκόντα πλεύσανθ’ ἑπτὰ ναυσὶ ναυβάτην ,

1028 ἄτιμον ἔβαλον , ὡς σὺ φής , κεῖνοι δὲ σέ .

1029 καὶ νῦν τί μ’ ἄγετε ; τί μ’ ἀπάγεσθε ; τοῦ χάριν ;

1030 ὃς οὐδέν εἰμι καὶ τέθνηχ’ ὑμῖν πάλαι .

1031 πῶς , ὦ θεοῖς ἔχθιστε , νῦν οὐκ εἰμί σοι

1032 χωλός , δυσώδης ; πῶς θεοῖς ἔξεσθ’ , ὁμοῦ

1033 πλεύσαντος αἴθειν ἱερά ; πῶς σπένδειν ἔτι ;

1034 αὕτη γὰρ ἦν σοι πρόφασις ἐκβαλεῖν ἐμέ .

1035 κακῶς ὄλοισθ’ · ὀλεῖσθε δ’ ἠδικηκότες

1036 τὸν ἄνδρα τόνδε , θεοῖσιν εἰ δίκης μέλει .

1037 ἔξοιδα δ’ ὡς μέλει γ’ · ἐπεὶ οὔποτ’ ἂν στόλον

1038 ἐπλεύσατ’ ἂν τόνδ’ εἵνεκ’ ἀνδρὸς ἀθλίου ,

1039 εἰ μή τι κέντρον θεῖον ἦγ’ ὑμᾶς ἐμοῦ .

1040 ἀλλ’ , ὦ πατρῴα γῆ θεοί τ’ ἐπόψιοι ,

1041 τίσασθε τίσασθ’ ἀλλὰ τῷ χρόνῳ ποτὲ

1042 ξύμπαντας αὐτούς , εἴ τι κἄμ’ οἰκτίρετε ·

1043 ὡς ζῶ μὲν οἰκτρῶς , εἰ δ’ ἴδοιμ’ ὀλωλότας

1044 τούτους , δοκοῖμ’ ἂν τῆς νόσου πεφευγέναι .