23.1 γρηῢς δʹ εἰς ὑπερῷʹ ἀνεβήσετο καγχαλόωσα ,
23.2 δεσποίνῃ ἐρέουσα φίλον πόσιν ἔνδον ἐόντα ·
23.3 γούνατα δʹ ἐρρώσαντο , πόδες δʹ ὑπερικταίνοντο .
23.4 στῆ δʹ ἄρʹ ὑπὲρ κεφαλῆς καί μιν πρὸς μῦθον ἔειπεν ·
23.5 ἔγρεο , Πηνελόπεια , φίλον τέκος , ὄφρα ἴδηαι
23.6 ὀφθαλμοῖσι τεοῖσι τά τʹ ἔλδεαι ἤματα πάντα .
23.7 ἦλθʹ Ὀδυσεὺς καὶ οἶκον ἱκάνεται , ὀψέ περ ἐλθών .
23.8 μνηστῆρας δʹ ἔκτεινεν ἀγήνορας , οἵ θʹ ἑὸν οἶκον
23.9 κήδεσκον καὶ κτήματʹ ἔδον βιόωντό τε παῖδα .
23.10 τὴν δʹ αὖτε προσέειπε περίφρων Πηνελόπεια ·
23.11 μαῖα φίλη , μάργην σε θεοὶ θέσαν , οἵ τε δύνανται
23.12 ἄφρονα ποιῆσαι καὶ ἐπίφρονά περ μάλʹ ἐόντα ,
23.13 καί τε χαλιφρονέοντα σαοφροσύνης ἐπέβησαν ·
23.14 οἵ σέ περ ἔβλαψαν · πρὶν δὲ φρένας αἰσίμη ἦσθα .
23.15 τίπτε με λωβεύεις πολυπενθέα θυμὸν ἔχουσαν
23.16 ταῦτα παρὲξ ἐρέουσα καὶ ἐξ ὕπνου μʹ ἀνεγείρεις
23.17 ἡδέος , ὅς μʹ ἐπέδησε φίλα βλέφαρʹ ἀμφικαλύψας ;
23.18 οὐ γάρ πω τοιόνδε κατέδραθον , ἐξ οὗ Ὀδυσσεὺς
23.19 ᾤχετʹ ἐποψόμενος Κακοΐλιον οὐκ ὀνομαστήν .
23.20 ἀλλʹ ἄγε νῦν κατάβηθι καὶ ἂψ ἔρχευ μέγαρόνδε .
23.21 εἰ γάρ τίς μʹ ἄλλη γε γυναικῶν , αἵ μοι ἔασι ,
23.22 ταῦτʹ ἐλθοῦσʹ ἤγγειλε καὶ ἐξ ὕπνου ἀνέγειρεν ,
23.23 τῷ κε τάχα στυγερῶς μιν ἐγὼν ἀπέπεμψα νέεσθαι
23.24 αὖτις ἔσω μέγαρον · σὲ δὲ τοῦτό γε γῆρας ὀνήσει .
23.25 τὴν δʹ αὖτε προσέειπε φίλη τροφὸς Εὐρύκλεια ·
23.26 οὔ τί σε λωβεύω , τέκνον φίλον , ἀλλʹ ἔτυμόν τοι
23.27 ἦλθʹ Ὀδυσεὺς καὶ οἶκον ἱκάνεται , ὡς ἀγορεύω ,
23.28 ὁ ξεῖνος , τὸν πάντες ἀτίμων ἐν μεγάροισι .