18.345 ὥρμαινε φρεσὶν ᾗσιν , ἅ ῥʹ οὐκ ἀτέλεστα γένοντο .
18.346 μνηστῆρας δʹ οὐ πάμπαν ἀγήνορας εἴα Ἀθήνη
18.347 λώβης ἴσχεσθαι θυμαλγέος , ὄφρʹ ἔτι μᾶλλον
18.348 δύη ἄχος κραδίην Λαερτιάδεω Ὀδυσῆος .
18.349 τοῖσιν δʹ Εὐρύμαχος , Πολύβου πάϊς , ἦρχʹ ἀγορεύειν ,
18.350 κερτομέων Ὀδυσῆα · γέλω δʹ ἑτάροισιν ἔτευχε .
18.351 κέκλυτέ μευ , μνηστῆρες ἀγακλειτῆς βασιλείης ,
18.352 ὄφρʹ εἴπω τά με θυμὸς ἐνὶ στήθεσσι κελεύει .
18.353 οὐκ ἀθεεὶ ὅδʹ ἀνὴρ Ὀδυσήϊον ἐς δόμον ἵκει ·
18.354 ἔμπης μοι δοκέει δαίδων σέλας ἔμμεναι αὐτοῦ
18.355 κὰκ κεφαλῆς , ἐπεὶ οὔ οἱ ἔνι τρίχες οὐδʹ ἠβαιαί .
18.356 ἦ ῥʹ , ἅμα τε προσέειπεν Ὀδυσσῆα πτολίπορθον ·
18.357 ξεῖνʹ , ἦ ἄρ κʹ ἐθέλοις θητευέμεν , εἴ σʹ ἀνελοίμην ,
18.358 ἀγροῦ ἐπʹ ἐσχατιῆς — μισθὸς δέ τοι ἄρκιος ἔσται —
18.359 αἱμασιάς τε λέγων καὶ δένδρεα μακρὰ φυτεύων ;
18.360 ἔνθα κʹ ἐγὼ σῖτον μὲν ἐπηετανὸν παρέχοιμι ,
18.361 εἵματα δʹ ἀμφιέσαιμι ποσίν θʹ ὑποδήματα δοίην .
18.362 ἀλλʹ ἐπεὶ οὖν δὴ ἔργα κάκʹ ἔμμαθες , οὐκ ἐθελήσεις
18.363 ἔργον ἐποίχεσθαι , ἀλλὰ πτώσσειν κατὰ δῆμον
18.364 βούλεαι , ὄφρʹ ἄν ἔχῃς βόσκειν σὴν γαστέρʹ ἄναλτον .
18.365 τὸν δʹ ἀπαμειβόμενος προσέφη πολύμητις Ὀδυσσεύς ·
18.366 Εὐρύμαχʹ , εἰ γὰρ νῶϊν ἔρις ἔργοιο γένοιτο
18.367 ὥρῃ ἐν εἰαρινῇ , ὅτε τʹ ἤματα μακρὰ πέλονται ,
18.368 ἐν ποίῃ , δρέπανον μὲν ἐγὼν εὐκαμπὲς ἔχοιμι ,
18.369 καὶ δὲ σὺ τοῖον ἔχοις , ἵνα πειρησαίμεθα ἔργου
18.370 νήστιες ἄχρι μάλα κνέφαος , ποίη δὲ παρείη .
18.371 εἰ δʹ αὖ καὶ βόες εἶεν ἐλαυνέμεν , οἵ περ ἄριστοι ,
18.372 αἴθωνες , μεγάλοι , ἄμφω κεκορηότε ποίης ,