17.350 Τηλέμαχός τοι , ξεῖνε , διδοῖ τάδε , καί σε κελεύει
17.351 αἰτίζειν μάλα πάντας ἐποιχόμενον μνηστῆρας ·
17.352 αἰδῶ δʹ οὐκ ἀγαθήν φησʹ ἔμμεναι ἀνδρὶ προΐκτῃ .
17.353 τὸν δʹ ἀπαμειβόμενος προσέφη πολύμητις Ὀδυσσεύς ·
17.354 Ζεῦ ἄνα , Τηλέμαχόν μοι ἐν ἀνδράσιν ὄλβιον εἶναι ,
17.355 καί οἱ πάντα γένοιθʹ ὅσσα φρεσὶν ᾗσι μενοινᾷ .
17.356 ἦ ῥα καὶ ἀμφοτέρῃσιν ἐδέξατο καὶ κατέθηκεν
17.357 αὖθι ποδῶν προπάροιθεν , ἀεικελίης ἐπὶ πήρης ,
17.358 ἤσθιε δʹ ἧος ἀοιδὸς ἐνὶ μεγάροισιν ἄειδεν ·
17.359 εὖθʹ ὁ δεδειπνήκειν , ὁ δʹ ἐπαύετο θεῖος ἀοιδός .
17.360 μνηστῆρες δʹ ὁμάδησαν ἀνὰ μέγαρʹ . αὐτὰρ Ἀθήνη ,
17.361 ἄγχι παρισταμένη Λαερτιάδην Ὀδυσῆα
17.362 ὤτρυνʹ , ὡς ἂν πύρνα κατὰ μνηστῆρας ἀγείροι ,
17.363 γνοίη θʹ οἵ τινές εἰσιν ἐναίσιμοι οἵ τʹ ἀθέμιστοι ·
17.364 ἀλλʹ οὐδʹ ὥς τινʹ ἔμελλʹ ἀπαλεξήσειν κακότητος .
17.365 βῆ δʹ ἴμεν αἰτήσων ἐνδέξια φῶτα ἕκαστον ,
17.366 πάντοσε χεῖρʹ ὀρέγων , ὡς εἰ πτωχὸς πάλαι εἴη .
17.367 οἱ δʹ ἐλεαίροντες δίδοσαν , καὶ ἐθάμβεον αὐτόν ,
17.368 ἀλλήλους τʹ εἴροντο τίς εἴη καὶ πόθεν ἔλθοι .
17.369 τοῖσι δὲ καὶ μετέειπε Μελάνθιος , αἰπόλος αἰγῶν ·
17.370 κέκλυτέ μευ , μνηστῆρες ἀγακλειτῆς βασιλείης ,
17.371 τοῦδε περὶ ξείνου · ἦ γάρ μιν πρόσθεν ὄπωπα .
17.372 ἦ τοι μέν οἱ δεῦρο συβώτης ἡγεμόνευεν ,
17.373 αὐτὸν δʹ οὐ σάφα οἶδα , πόθεν γένος εὔχεται εἶναι .
17.374 ὣς ἔφατʹ , Ἀντίνοος δʹ ἔπεσιν νείκεσσε συβώτην ·
17.375 ὦ ἀρίγνωτε συβῶτα , τίη δὲ σὺ τόνδε πόλινδε
17.376 ἤγαγες ; ἦ οὐχ ἅλις ἧμιν ἀλήμονές εἰσι καὶ ἄλλοι ,
17.377 πτωχοὶ ἀνιηροί , δαιτῶν ἀπολυμαντῆρες ;
17.378 ἦ ὄνοσαι ὅτι τοι βίοτον κατέδουσιν ἄνακτος