15.180 οὕτω νῦν Ζεὺς θείη , ἐρίγδουπος πόσις Ἥρης ·
15.181 τῷ κέν τοι καὶ κεῖθι θεῷ ὣς εὐχετοῴμην .
15.182 ἦ καὶ ἐφʹ ἵπποιϊν μάστιν βάλεν · οἱ δὲ μάλʹ ὦκα
15.183 ἤϊξαν πεδίονδε διὰ πτόλιος μεμαῶτες .
15.184 οἱ δὲ πανημέριοι σεῖον ζυγὸν ἀμφὶς ἔχοντες .
15.185 δύσετό τʹ ἠέλιος σκιόωντό τε πᾶσαι ἀγυιαί ·
15.186 ἐς Φηρὰς δʹ ἵκοντο Διοκλῆος ποτὶ δῶμα ,
15.187 υἱέος Ὀρτιλόχοιο , τὸν Ἀλφειὸς τέκε παῖδα .
15.188 ἔνθα δὲ νύκτʹ ἄεσαν ὁ δὲ τοῖς πὰρ ξείνια θῆκεν .
15.189 ἦμος δʹ ἠριγένεια φάνη ῥοδοδάκτυλος Ἠώς ,
15.190 ἵππους τε ζεύγνυντʹ ἀνά θʹ ἅρματα ποικίλʹ ἔβαινον ,
15.191 ἐκ δʹ ἔλασαν προθύροιο καὶ αἰθούσης ἐριδούπου ·
15.192 μάστιξεν δʹ ἐλάαν , τὼ δʹ οὐκ ἄκοντε πετέσθην .
15.193 αἶψα δʹ ἔπειθʹ ἵκοντο Πύλου αἰπὺ πτολίεθρον ·
15.194 καὶ τότε Τηλέμαχος προσεφώνεε Νέστορος υἱόν ·
15.195 Νεστορίδη , πῶς κέν μοι ὑποσχόμενος τελέσειας
15.196 μῦθον ἐμόν ; ξεῖνοι δὲ διαμπερὲς εὐχόμεθʹ εἶναι
15.197 ἐκ πατέρων φιλότητος , ἀτὰρ καὶ ὁμήλικές εἰμεν ·
15.198 ἥδε δʹ ὁδὸς καὶ μᾶλλον ὁμοφροσύνῃσιν ἐνήσει .
15.199 μή με παρὲξ ἄγε νῆα , διοτρεφές , ἀλλὰ λίπʹ αὐτοῦ ,
15.200 μή μʹ ὁ γέρων ἀέκοντα κατάσχῃ ᾧ ἐνὶ οἴκῳ
15.201 ἱέμενος φιλέειν · ἐμὲ δὲ χρεὼ θᾶσσον ἱκέσθαι .
15.202 ὣς φάτο , Νεστορίδης δʹ ἄρʹ ἑῷ συμφράσσατο θυμῷ ,
15.203 ὅππως οἱ κατὰ μοῖραν ὑποσχόμενος τελέσειεν .
15.204 ὧδε δέ οἱ φρονέοντι δοάσσατο κέρδιον εἶναι ·
15.205 στρέψʹ ἵππους ἐπὶ νῆα θοὴν καὶ θῖνα θαλάσσης ,
15.206 νηῒ δʹ ἐνὶ πρύμνῃ ἐξαίνυτο κάλλιμα δῶρα ,
15.207 ἐσθῆτα χρυσόν τε , τά οἱ Μενέλαος ἔδωκε ·
15.208 καί μιν ἐποτρύνων ἔπεα πτερόεντα προσηύδα ·