Greek Reader — The Homeric Odyssey (9.532

9.532 ἀλλʹ εἴ οἱ μοῖρʹ ἐστὶ φίλους τʹ ἰδέειν καὶ ἱκέσθαι

9.533 οἶκον ἐυκτίμενον καὶ ἑὴν ἐς πατρίδα γαῖαν ,

9.534 ὀψὲ κακῶς ἔλθοι , ὀλέσας ἄπο πάντας ἑταίρους ,

9.535 νηὸς ἐπʹ ἀλλοτρίης , εὕροι δʹ ἐν πήματα οἴκῳ .

9.536 ὣς ἔφατʹ εὐχόμενος , τοῦ δʹ ἔκλυε κυανοχαίτης .

9.537 αὐτὰρ ὅ γʹ ἐξαῦτις πολὺ μείζονα λᾶαν ἀείρας

9.538 ἧκʹ ἐπιδινήσας , ἐπέρεισε δὲ ἶνʹ ἀπέλεθρον ,

9.539 κὰδʹ δʹ ἔβαλεν μετόπισθε νεὸς κυανοπρῴροιο

9.540 τυτθόν , ἐδεύησεν δʹ οἰήιον ἄκρον ἱκέσθαι .

9.541 ἐκλύσθη δὲ θάλασσα κατερχομένης ὑπὸ πέτρης ·

9.542 τὴν δὲ πρόσω φέρε κῦμα , θέμωσε δὲ χέρσον ἱκέσθαι .

9.543 ἀλλʹ ὅτε δὴ τὴν νῆσον ἀφικόμεθʹ , ἔνθα περ ἄλλαι

9.544 νῆες ἐύσσελμοι μένον ἁθρόαι , ἀμφὶ δʹ ἑταῖροι

9.545 ἥατʹ ὀδυρόμενοι , ἡμέας ποτιδέγμενοι αἰεί ,

9.546 νῆα μὲν ἔνθʹ ἐλθόντες ἐκέλσαμεν ἐν ψαμάθοισιν ,

9.547 ἐκ δὲ καὶ αὐτοὶ βῆμεν ἐπὶ ῥηγμῖνι θαλάσσης .

9.548 μῆλα δὲ Κύκλωπος γλαφυρῆς ἐκ νηὸς ἑλόντες

9.549 δασσάμεθʹ , ὡς μή τίς μοι ἀτεμβόμενος κίοι ἴσης .

9.550 ἀρνειὸν δʹ ἐμοὶ οἴῳ ἐυκνήμιδες ἑταῖροι

9.551 μήλων δαιομένων δόσαν ἔξοχα · τὸν δʹ ἐπὶ θινὶ

9.552 Ζηνὶ κελαινεφέι Κρονίδῃ , ὃς πᾶσιν ἀνάσσει ,

9.553 ῥέξας μηρίʹ ἔκαιον · ὁ δʹ οὐκ ἐμπάζετο ἱρῶν ,

9.554 ἀλλʹ ὅ γε μερμήριξεν ὅπως ἀπολοίατο πᾶσαι

9.555 νῆες ἐύσσελμοι καὶ ἐμοὶ ἐρίηρες ἑταῖροι .

9.556 ὣς τότε μὲν πρόπαν ἦμαρ ἐς ἠέλιον καταδύντα

9.557 ἥμεθα δαινύμενοι κρέα τʹ ἄσπετα καὶ μέθυ ἡδύ ·

9.558 ἦμος δʹ ἠέλιος κατέδυ καὶ ἐπὶ κνέφας ἦλθε ,

9.559 δὴ τότε κοιμήθημεν ἐπὶ ῥηγμῖνι θαλάσσης .

9.560 ἦμος δʹ ἠριγένεια φάνη ῥοδοδάκτυλος Ἠώς ,

9.561 δὴ τότʹ ἐγὼν ἑτάροισιν ἐποτρύνας ἐκέλευσα