Χορός
344 οὗτος ἁνὴρ τοῦτ’ ἐτόλμησεν
344a λέγειν , εἰ
345 μὴ ξυνωμότης τις ἦν .
346 ἀλλ’ ἐκ τούτων ὥρα τινά σοι ζητεῖν καινὴν ἐπίνοιαν ,
347 ἥτις σε λάθρᾳ τἀνδρὸς τουδὶ καταβῆναι δεῦρο ποιήσει .
Φιλοκλέων
348 τίς ἂν οὖν εἴη ; ζητεῖθ’ ὑμεῖς , ὡς πᾶν ἂν ἔγωγε ποιοίην ·
349 οὕτω κιττῶ διὰ τῶν σανίδων μετὰ χοιρίνης περιελθεῖν .
Χορός
350 ἔστιν ὀπὴ δῆθ’ ἥντιν’ ἂν ἔνδοθεν οἷός τ’ εἴης διορύξαι ,
351 εἶτ’ ἐκδῦναι ῥάκεσιν κρυφθεὶς ὥσπερ πολύμητις Ὀδυσσεύς ;
Φιλοκλέων
352 πάντα πέφαρκται κοὐκ ἔστιν ὀπῆς οὐδ’ εἰ σέρφῳ διαδῦναι .
353 ἀλλ’ ἄλλο τι δεῖ ζητεῖν ὑμᾶς · ὀπίαν δ’ οὐκ ἔστι γενέσθαι .
Χορός
354 μέμνησαι δῆθ’ , ὅτ’ ἐπὶ στρατιᾶς κλέψας ποτὲ τοὺς ὀβελίσκους
355 ἵεις σαυτὸν κατὰ τοῦ τείχους ταχέως , ὅτε Νάξος ἑάλω .
Φιλοκλέων
356 οἶδ’ · ἀλλὰ τί τοῦτ’ ; οὐδὲν γὰρ τοῦτ’ ἐστὶν ἐκείνῳ προσόμοιον .
357 ἥβων γὰρ κἀδυνάμην κλέπτειν , ἴσχυόν τ’ αὐτὸς ἐμαυτοῦ ,
358 κοὐδείς μ’ ἐφύλαττ’ , ἀλλ’ ἐξῆν μοι
359 φεύγειν ἀδεῶς . νῦν δὲ ξὺν ὅπλοις
360 ἄνδρες ὁπλῖται διαταξάμενοι
361 κατὰ τὰς διόδους σκοπιωροῦνται ,
362 τὼ δὲ δύ’ αὐτῶν ἐπὶ ταῖσι θύραις
363 ὥσπερ με γαλῆν κρέα κλέψασαν
364 τηροῦσιν ἔχοντ’ ὀβελίσκους .